اردو انٹرنیشنل (مانیٹرنگ ڈیسک) کاؤنٹر ٹیررازم ڈیپارٹمنٹ (سی ٹی ڈی) کے مطابق خیبر پختونخوا میں رواں سال دہشتگردی کے 670 واقعات رپورٹ ہوئے۔ دہشتگردی کے سب سے زیادہ 121 واقعات ڈیرہ اسماعیل خان (ڈی آئی خان) میں پیش آئے۔ بنوں میں 116 اور خیبر میں 80 ناخوشگوار واقعات رونما ہوئے۔
سی ٹی ڈی رپورٹ کے مطابق دہشتگردی کے خلاف کارروائیوں میں 212 شدت پسند مارے گئے۔ مارے جانے والوں میں سب سے زیادہ ہلاکتیں ڈی آئی خان میں ہوئیں جہاں 80 شدت پسند مارے گئے۔ بنوں میں 41 اور خیبر میں 23 شدت پسندوں کو قتل کیا گیا۔
سی ٹی ڈی نے رواں سال شمالی وزیرستان میں 19 شدت پسند مارے جبکہ مختلف کارروائیوں کے دوران قانون نافذ کرنے والے اداروں کے 204 اہلکار شہید جبکہ 383 اہلکار زخمی ہوئے۔ حملوں میں 174 عام شہری بھی شہید جبکہ 275 زخمی ہوئے۔ دہشتگردی میں 149 پولیس اہلکار شہید اور 232 زخمی ہوئے۔
