اردو انٹرنیشنل (اسپورٹس ویب ڈیسک) تفصیلات کے مطابق پاکستان کے راشد ملک اور برطانیہ کے اینڈریو ہیبل کی جوڑی نے دبئی میں جاری آئی ٹی ایف ماسٹرز-ایم ٹی200 ٹورنامنٹ میں 60 پلس ڈبلز کیٹیگری کے فائنل میں جگہ بنا لی ۔
سیمی فائنل میں ان کا مقابلہ پاکستانی کھلاڑیوں وقار نثار اور انعام الحق کی جوڑی سے ہوا۔ اس میچ میں راشد ملک اور اینڈریو ہیبل کی شاندار ہم آہنگی اور مہارت نے سب کو متاثر کیا۔ انہوں نے میچ 6-3، 6-2 کے زبردست سکور سے جیت لیا۔
پہلے سیٹ میں دونوں ٹیموں نے مضبوط آغاز کیا، لیکن راشد ملک اور اینڈریو ہیبل نے جلد ہی کھیل پر غلبہ حاصل کرلیا۔ انہوں نے اپنے مخالفین کی غلطیوں کا فائدہ اٹھاتے ہوئے بہترین کھیل کا مظاہرہ کیا اور کچھ مزاحمت کا سامنا کرنے کے باوجود، انہوں نے پہلا سیٹ 6-3 سے جیت لیا۔
دوسرے سیٹ میں، ملک اور ہیبل نے اپنیشاندار کارکردگی جاری رکھتے ہوئے اپنے مخالفین نثار اورانعام الحق کی سروس کو جلد ہی توڑ دیا۔ انہوں نے دوسرا سیٹ 6-2 سے اپنے نام کیا اور فائنل میں جگہ بنا لی۔
اب راشد ملک 60 پلس کیٹیگری کے سنگلز فائنل میں اپنے ڈبلز پارٹنر اینڈریو ہیبل کا سامنا کرنے کے لیے تیار ہیں۔ راشد اس ایونٹ میں سنگلز اور ڈبلز دونوں ٹائٹل جیتنے کی کوشش کر رہے ہیں۔
