اردو انٹرنیشنل اسپورٹس ڈیسک تفصیلات کے مطابق پاکستان والی بال فیڈریشن (پی وی ایف ) اگلے ماہ اسلام آباد میں سینٹرل ایشین والی بال لیگ کا انعقاد کرے گی جس میں چھ ٹیموں نے پہلے ہی ٹورنامنٹ میں شرکت کی تصدیق کر دی ہے۔
پاکستان سپورٹس کمپلیکس کے لیاقت جمنازیم میں قومی والی بال ٹیم کے تربیتی کیمپ کا دورہ کرنے والے پی وی ایف کے چیئرمین چوہدری محمد یعقوب نے کہا کہ فیڈریشن نے سنٹرل ایشین والی بال لیگ 11 سے 17 مئی تک اسلام آباد میں منعقد کرنے کا فیصلہ کیا ہے۔
ایونٹ میں پاکستان کے علاوہ ایران، ترکمانستان، سری لنکا، قازقستان، افغانستان، کرغزستان کی ٹیمیں شرکت کریں گی۔ انہوں نے کہا کہ امید ہے کہ بھارت بھی اپنی ٹیم پاکستان بھیجے گا۔
انہوں نے کہا کہ ہم نے والی بال کی ترقی اور کھیل کے معیار کو مزید بہتر بنانے کے لیے حکومت سے مالی تعاون کی درخواست کی ہے۔ پی وی ایف چیئرمین یعقوب نے کہا کہ ہم پاکستان ٹیم کو ایشیا میں بہترین ٹیم دیکھنا چاہتے ہیں ،انہوں نے مزید کہا کہ محدود وسائل کے باوجود پی وی ایف قومی کھلاڑیوں کو ہر ممکن سہولیات فراہم کر رہا ہے۔
پی وی ایف کے چیئرمین نے کہا کہ لیگ کی تیاریوں کے لیے قومی ٹیم کا تربیتی کیمپ یہاں جاری ہے۔ انہوں نے کہا کہ ایران ایونٹ میں ایک مضبوط ٹیم ہے لیکن ہم امید کر رہے ہیں کہ پاکستان میگا ایونٹ میں کامیاب ہو گا۔ انہوں نے کہا کہ لیگ کے کامیاب انعقاد کے لیے تمام انتظامات کو حتمی شکل دے دی گئی ہے کیونکہ یہ ایونٹ دنیا کے سامنے پاکستان کا سافٹ امیج اجاگر کرے گا۔
انہوں نے کہا کہ برازیلین کوچ کے جانے کے بعد اب قومی ٹیم کے لیے ارجنٹائن کے کوچ کی خدمات حاصل کر لی گئی ہیں اور ہماری کوشش ہے کہ محدود وسائل کے باوجود نوجوان باصلاحیت کھلاڑیوں کو زیادہ سے زیادہ انٹرنیشنل ایونٹس فراہم کیے جائیں۔
یعقوب نے کہا کہ ایک دن میں تین میچ ہوں گے۔ ہم لیگ کے لیے بین الاقوامی تقاضوں کے مطابق لیاقت جمنازیم تیار کر رہے ہیں۔ انہوں نے کہا کہ میں تقریب کے مناسب انعقاد کے لیے بین الصوبائی رابطہ (آئی پی سی) کے وزیر سے ملنے کا بھی ارادہ رکھتا ہوں۔
