دو دہائیوں بعد بی این پی کی واپسی، تاریق رحمان نے وزیراعظم کا حلف اٹھا لیا

اردو انٹرنیشنل (مانیٹرنگ ڈیسک رائٹرز کی خبر کے مطابق بنگلہ دیش نیشنلسٹ پارٹی (بی این پی) کے سربراہ طارق رحمان نے منگل کے روز بنگلہ دیش کے وزیراعظم کے طور پر حلف اٹھا لیا۔ خبر رساں ادارے رائٹرز کے مطابق پارلیمانی انتخابات میں بی این پی کی واضح کامیابی کے بعد یہ پیش رفت ملک میں ایک بڑی سیاسی تبدیلی کے طور پر دیکھی جا رہی ہے۔

طارق رحمان کی عمر 60 سال ہے اور وہ سابق وزیراعظم خالدہ ضیا کے صاحبزادے جبکہ سابق صدر ضیاء الرحمان کے بیٹے ہیں، جنہیں قتل کر دیا گیا تھا۔ رائٹرز کے مطابق نئی حکومت کو فوری طور پر سیاسی استحکام کی بحالی، سرمایہ کاروں کا اعتماد واپس لانے اور 2024 کے بحران کے بعد گارمنٹس سیکٹر سمیت اہم صنعتوں کو دوبارہ فعال کرنے جیسے بڑے چیلنجز کا سامنا ہوگا۔

حلف برداری کی تقریب روایت سے ہٹ کر جاتیہ سنگساد بھبن (قومی پارلیمنٹ) کے ساؤتھ پلازہ میں کھلے آسمان تلے منعقد کی گئی، جبکہ عموماً یہ تقریب بنگابھبن میں ہوتی ہے۔ بنگلہ دیش کے صدر محمد شہاب الدین نے طارق رحمان اور ان کی کابینہ سے حلف لیا۔ تقریب میں سینئر سیاسی رہنما، سفارت کار، سول و عسکری حکام اور مختلف ممالک کے نمائندے شریک تھے، جن میں چین، بھارت اور پاکستان بھی شامل تھے۔

رپورٹ کے مطابق بی این پی نے پارلیمنٹ میں دو تہائی اکثریت حاصل کر کے تقریباً دو دہائیوں بعد اقتدار میں واپسی کی ہے۔ دوسری جانب جماعتِ اسلامی نے، جو 2013 کی پابندی کے بعد پہلی بار انتخابات میں شریک ہوئی، ریکارڈ 68 نشستیں جیت لیں۔ رائٹرز کے مطابق شیخ حسینہ کی جماعت عوامی لیگ انتخابات میں حصہ نہیں لے سکی کیونکہ الیکشن کمیشن نے پارٹی کی رجسٹریشن منسوخ کر دی تھی۔ جماعت اسلامی اور اس کے اتحادی، جن میں نیشنل سٹیزن پارٹی بھی شامل ہے، اپوزیشن تشکیل دیں گے۔

انتخابات سے قبل عبوری دور میں ملک کا انتظام نوبیل انعام یافتہ محمد یونس کی قیادت میں عبوری حکومت کے پاس رہا۔ طارق رحمان گزشتہ سال 17 سالہ خود ساختہ جلاوطنی کے بعد لندن سے واپس بنگلہ دیش آئے تھے۔ مخالفین ان پر کرپشن کے الزامات لگاتے رہے ہیں، تاہم وہ ان الزامات کی تردید کرتے ہیں۔

انتخابی کامیابی کے بعد اپنے پہلے بیان میں تاریق رحمان نے کہا کہ امن، قانون اور نظم ہر قیمت پر برقرار رہنا چاہیے اور اپنے حامیوں کو انتقامی کارروائی سے گریز کی ہدایت دیتے ہوئے خبردار کیاکہ وہ کسی قسم کی افراتفری برداشت نہیں کریں گے۔