اپنی جماعت کی جانب سے بطور امیدوار برائے وزیر اعظم اپنی نامزدگی کو قبول کرتا ہوں،بلاول بھٹو
پاکستان پیپلزپارٹی پارلیمنٹرینز کے صدر آصف علی زرداری چیئرمین پی پی پی بلاول بھٹو زرداری کا نام پاکستان پیپلزپارٹی کی جانب سے وزیراعظم کے امیدوار کے طور پر پیش کردیا ہے جبکہ صدر آصف علی زرداری کی قرارداد کی سینٹرل ایگزیکٹو کمیٹی نے توثیق بھی کی ہے۔
پاکستان پیپلزپارٹی کے چیئرمین بلاول بھٹو زرداری نے سوشل میڈیا پیلٹ فارم ایکس ٹویٹر پر اپنے پیغام میں کہا ہے کہ
میں انتہائی شکرگزاری اور عاجزی کے ساتھ اپنی جماعت کی جانب سے بطور امیدوار برائے وزیر اعظم اپنی نامزدگی کو قبول کرتا ہوں۔
بلاول بھٹو نے لکھا ہے کہ 8 فروری کو ہمیں نفرت اور تقسیم کی پرانی سیاست کو ختم کرنا ہوگا۔ ملک کو خدمات کی نئی سیاست کے تحت متحد کریں گے۔
انہوں نے کہا کہ ہمارا 10 نکاتی منصوبہ تمام لوگوں کے مفادات کو پورا کرے گا ۔ ہم مل کر غربت، بے روزگاری اور مہنگائی کو شکست دیں گے۔
بلاول بھٹو نے کہا کہ ہم سب مل کر ایک پرامن، خوشحال اور ترقی پسند پاکستان بنائیں گے۔
