الریاضیہ کے مطابق، سعودی عرب کو اگلے ماہ فیفا ورلڈ کپ 2026 کوالیفائر کے لیے پاکستان کا دورہ موخر کرنے پر مجبور کیا گیا۔
سعودی اسکواڈ کو میچ سے دو روز قبل اسلام آباد روانہ ہونا تھا لیکن بعد میں مناسب ٹریننگ فیلڈز کی عدم موجودگی اور جناح اسٹیڈیم کی خراب حالت کے باعث اسے ایک دن میں تبدیل کردیا گیا۔
واضح رہے کہ فیفا ورلڈ کپ 2026 کے ایشین کوالیفائرز کے دوسرے راؤنڈ کے دوران پاکستان کا مقابلہ 6 جون کو جناح اسٹیڈیم میں سعودی عرب سے ہوگا۔
پاکستان گروپ جی میں سب سے نیچے ہے کیونکہ وہ اب تک کھیلے گئے چاروں میچ ہار چکا ہے۔ پاکستان نے نومبر میں الاحساء میں سعودی عرب کے ہاتھوں 4-0 سے شکست کے ساتھ اپنے سفر کا آغاز کیا تھا جس کے بعد اسی ماہ اسلام آباد میں تاجکستان کے ہاتھوں 6-1 سے شکست کا سامنا کرنا پڑا تھا۔
اس کے بعد اردن نے اسلام آباد میں رمضان المبارک میں کھیلے گئے کھیل میں پاکستان کو 3-0 سے شکست دی اور عمان انٹرنیشنل اسٹیڈیم میں شاہینز نے ریورس میچ بھی 7-0 سے ہارا۔
ادھر پاکستان فٹبال ٹیم کے اسسٹنٹ کوچ ترشن پٹیل کا خیال ہے کہ قومی ٹیم سعودی عرب کے خلاف مزید عزم کے ساتھ کھیلے گی۔
پاکستان فٹ بال فیڈریشن کے ایک پریس ریلیز میں پٹیل نے کہا کہ :”سعودی عرب ایک شاندار ٹیم ہے۔ تاہم، ہم ہر کھیل کو جوش، عزم اور لڑائی کے ساتھ دیکھیں گے، خوف کے ساتھ نہیں۔ اگرچہ ہمارے آخری دو کوالیفائنگ میچ مایوس کن تھے، لیکن مجھے یقین ہے کہ آخری دو گیمز میں ہم بہترین حکمت عملی کے ساتھ ، زیادہ پرعزم ہوکر شاندار کھیل کا مظاہرہ کریں گے.”
ترشن پٹیل ، جنہیں پرفارمنس اینالسٹ کی ذمہ داری بھی سونپی گئی ہے، نے مزید کہا: “میرے خیال میں سب سے پہلے اور سب سے اہم بات یہ ہے کہ جب آپ سعودی عرب جیسی اعلیٰ صلاحیت کے حامل اپوزیشن کا مقابلہ کرتے ہیں، تو آپ کو واضح ہونا چاہیے کہ آپ کیا چاہتے ہیں ۔ کیمپ کے لڑکوں نے بہت محنت سے تربیت حاصل کی ہے اور ہم ایک ٹیم کے طور پر تیار ہونے اور صحیح تربیت فراہم کرنے کے لیے مسلسل کام کر رہے ہیں تاکہ ہماری رفتارترقی کی طرف ہو۔”
