اردو انٹرنیشنل اسپورٹس ڈیسک تفصیلات کے مطابق جناح اسپورٹس کمپلیکس اسلام آباد میں جاری نیشنل چیلنج کپ 2023 کے فائنل راؤنڈ کے چوتھے روز چار میچ کھیلے گئے۔ پہلے میچ میں واپڈا نے پاکستان پولیس کو 3-0 سے شکست دی۔اس میچ میں عالمگیر نے دو گول کیے جبکہ شائق دوست نے ایک گول کیا۔
دوسرے میچ میں ایشیا گھی ملز نے محمد سلیمان علی کے واحد گول کی بدولت پاک ریلوے کو 1-0 سے شکست دے کر کامیابی حاصل کی۔ تیسرے میچ میں، ڈبلیو ایس ٹی سی نے اوٹو کرینز کو 3-2 سے شکست دی۔ رضا نے دو گول جبکہ زید نے ڈبلیو ایس ٹی سی کے لیے ایک گول کیا۔ اوٹو کرینز کے محمد سعد اور صدام حسین اپنی ٹیم کے لیے ایک ایک گول کر سکے ۔
چوتھے میچ میں ایس اے گارڈنز نے پی اے ایف کو سخت مقابلے کے بعد 3-2 سے شکست دی۔ مرتضیٰ حسین نے ایس اے گارڈنز کے لیے دو، جبکہ سمنان نے ایک گول کیا. پی اے ایف کی جانب سے حسیب اور فصیل ایک ایک گول کرنے میں کامیاب رہے۔
