اردو انٹرنیشنل (مانیٹرنگ ڈیسک) مراکش کے ساحل پر کشتی الٹنے سے کم از کم 69 افراد ہلاک ہو گئے جن میں مالی کے 25 شہری بھی شامل تھے۔
فارس نیوز کے مطابق، مالی حکومت کے حکام نے بتایا ہے کہ مراکش کے پانیوں میں ایک کشتی کے ڈوبنے کے بعد کم از کم 69 پناہ گزین، جن میں 25 مالی کے شہری بھی شامل ہیں، ہلاک ہو گئے ہیں۔
یہ کشتی، جو مغربی افریقہ کے ساحلوں سے اسپین کے لیے روانہ ہوئی تھی، 80 پناہ گزینوں کو لے جا رہی تھی، جن میں سے صرف 11 افراد زندہ بچ سکے ہیں۔
بی بی سی نے کہا ہے کہ یہ کشتی چند روز پہلے ڈوبی تھی، لیکن مالی حکومت نے جمعرات کے روز اس کی اطلاع دی ہے۔
اس معاملے کی تحقیقات کے لیے ایک بحران یونٹ علاقے میں بھیجا گیا ہے۔ مالی کئی سالوں سے شدت پسندوں اور علیحدگی پسندوں کے تنازعات میں الجھا ہوا ہے، جو 2020 اور 2021 میں دو بار بغاوت کا سبب بنے۔
رپورٹس کے مطابق یورپ اور امریکا میں موجود اپنے دوستوں کے ساتھ بات چیت کے بعد متاثرین نے حوصلہ پایا کہ وہ خطرناک سفر اختیار کریں جب کہ ان میں سے کچھ نے اپنے گھر والوں کو بتائے بغیر ہی خطرناک سفر کیا۔
