افغانستان کرکٹ بورڈ کا پاکستان، یو اے ای کے ساتھ یوتھ ٹرائی سیریز کھیلنے پر غور
اردو انٹرنیشنل (اسپورٹس ڈیسک )تفصیلات کے مطابق افغانستان کرکٹ بورڈ آنے والے مہینوں میں پاکستان اور متحدہ عرب امارات کے ساتھ یوتھ ٹرائی سیریز کھیلنے پر غور کر رہا ہے۔
اے سی بی نے ایک پریس ریلیز میں کہا کہ افغانستان کرکٹ بورڈ کے چیئرمین، مسٹر میرویس اشرف، اور سی ای او، مسٹر نصیب خان نے آئی سی سی بورڈ میٹنگ میں شرکت کی جو اس ہفتے سری لنکا میں منعقد ہوئی تھی اور اس میں دیگر رکن ممالک کے نمائندوں نے بھی شرکت کی تھی۔
میٹنگ کے دوران،اے سی بی کی قیادت نے افغانستان کرکٹ بورڈ کے لیے حالیہ کامیابیوں، سرگرمیوں اور مستقبل کے منصوبوں کو پیش کیا انہوں نے کرکٹ جنوبی افریقہ، کرکٹ نیوزی لینڈ، اور کرکٹ ویسٹ انڈیز کے نمائندوں کے ساتھ آئی سی سی چیمپئنز ٹرافی 2025 سے قبل ممکنہ وائٹ بال دو طرفہ کرکٹ کے بارے میں بھی بات چیت کی۔
بات چیت میں اے ٹیم کے بنگلہ دیش اور زمبابوے کے دورے، اور پاکستان اور متحدہ عرب امارات کے خلاف یوتھ ٹرائی سیریز کا امکان بھی شامل تھا، جس کی تاریخوں اور مقامات کی تصدیق کی جائے گی۔
آئی سی سی کی قیادت اور میٹنگ کے شرکاء نے آئی سی سی مینز ٹی ٹوئنٹی ورلڈ کپ 2024 میں اے سی بی اور افغان ٹیم کی حالیہ کامیابیوں کی تعریف کی اور ٹیم کی شاندار کارکردگی اور دنیا بھر کے شائقین کو تفریح فراہم کرنے اور افغانستان میں کرکٹ کی ترقی کے لیے ان کی اہم شراکت پر روشنی ڈالی۔
راشد خان کی قیادت میں افغانستان کی کرکٹ ٹیم نے حال ہی میں ٹی ٹوئنٹی ورلڈ کپ 2024 میں کرکٹ کی دنیا کو حیران کر دیا، انہوں نے آسٹریلیا، نیوزی لینڈ جیسی ٹیموں کو شکست دے کر سیمی فائنل میں جگہ بنائی.
