سمر گیمز 2024 کبڈی ایونٹ کا تیسرا اور آخری مرحلہ شروع
اردو انٹرنیشنل اسپورٹس ویب ڈیسک تفصیلات کے مطابق سمر گیمز 2024 کبڈی ایونٹ کا تیسرا اور آخری مرحلہ جمعہ کو پنجاب سٹیڈیم میں شروع ہوا۔ جس میں ڈائریکٹر ایڈمن ڈاکٹر ایم کلیم مہمان خصوصی تھے اور انہوں نے تقریب کا افتتاح بھی کیا۔ اس کے علاوہ ڈائریکٹر یوتھ افیئرز رانا ندیم انجم، ڈائریکٹر سپورٹس یاسمین اختر، کوآرڈینیٹر سپورٹس ملک انوش کھوکھر، ڈپٹی ڈائریکٹر ظہور احمد، ڈپٹی ڈائریکٹر عطا الرحمان، چیف سپورٹس کنسلٹنٹ حفیظ بھٹی، معروف پہلوان ندیم پہلوان، تمام ڈویژنل سپورٹس آفیسرز اور کبڈی کھلاڑیوں کی بڑی تعداد نے شرکت کی۔اس موقع پر اور افسران بھی موجود تھے۔
تقریب سے قبل ڈائریکٹر ایڈمن ڈاکٹر ایم کلیم کا تمام ٹیموں کے کھلاڑیوں اور آفیشلز سے تعارف کرایا گیا۔ افتتاحی تقریب میں قومی ترانہ بھی پیش کیا گیا۔ افتتاحی تقریب میں کھلاڑیوں اور کبڈی شائقین نے ڈھول کی تھاپ پر رقص کیا۔
افتتاحی تقریب کے موقع پر میڈیا سے گفتگو کرتے ہوئے ڈائریکٹر ایڈمن ڈاکٹر ایم کلیم نے کہا کہ سمر گیمز 2024 کے ایونٹس کا انعقاد وزیر اعلیٰ پنجاب مریم نواز کے ویژن کے مطابق اور پنجاب کے وزیر کھیل و امور نوجوانان ملک فیصل ایوب کھوکھر کی نگرانی میں کیا جا رہا ہے۔ ڈائریکٹر جنرل سپورٹس پنجاب پرویز اقبال کی ہدایت پر تمام حصہ لینے والے کھلاڑیوں اور آفیشلز کو اعلیٰ سطح کی سہولیات فراہم کی جا رہی ہیں۔
اقوام متحدہ کے امن مشنز میں پاکستانی اہلکاروں کی شرکت کو بڑھایا جائے۔
ڈائریکٹر ایڈمن ڈاکٹر ایم کلیم نے بتایا کہ کبڈی چیمپئن شپ میں پنجاب کے 9 ڈویژنز کی ٹیمیں حصہ لے رہی ہیں۔ “آج کبڈی کے نوجوان کھلاڑیوں کے لیے اپنی صلاحیتوں کو دکھانے اور ثابت کرنے کا ایک تاریخی موقع ہے”۔
انہوں نے کہا کہ کبڈی ہماری سرزمین کا کھیل ہے اور پنجاب کے لوگ اس کھیل کو بہت پسند کرتے ہیں۔ کبڈی پنجاب کی پہچان ہے۔ ہماری سکروٹنی کمیٹی اس چیمپئن شپ سے باصلاحیت کھلاڑیوں کا انتخاب کرے گی۔ اس ایونٹ سے قبل سمر گیمز 2024 کے ہاکی اور والی بال ایونٹس سے کئی باصلاحیت کھلاڑی سامنے آئے ہیں” افتتاحی میچ میں ساہیوال ڈویژن نے ڈی جی خان کو 45-33 پوائنٹس سے شکست دی۔
