لاہور: قومی فٹ بالرز 2026 فیفا ورلڈ کپ کوالیفائرز کے دوسرے راؤنڈ گروپ جی میں سعودی عرب اور تاجکستان کے خلاف بیک ٹو بیک میچوں کی تیاریوں کا آغاز کرنے کے لیے (کل) جمعرات کو اسلام آباد میں جمع ہونا شروع کر دیں گے۔
پاکستان 6 جون کو جناح اسٹیڈیم اسلام آباد میں سعودی عرب کی میزبانی کرے گا اور اس کے بعد 11 جون کو تاجکستان کے خلاف پامیر اسٹیڈیم دوشنبہ میں کھیلے گا۔ پاکستان گروپ میں سب سے نیچے ہے کیونکہ وہ اب تک کھیلے گئے اپنے چاروں میچ ہار چکے ہیں۔ پاکستان نے اپنے گروپ جی کے سفر کا آغاز نومبر میں الاحساء میں سعودی عرب کے ہاتھوں 4-0 سے شکست کے ساتھ کیا تھا ،جس کے بعد پاکستان کو اسی ماہ اسلام آباد میں تاجکستان کے ہاتھوں 6-1 سے شکست کا سامنا کرنا پڑا تھا۔
اس کے بعد اردن نے اسلام آباد میں رمضان المبارک میں کھیلے گئے میچ میں پاکستان کو 3-0 سے شکست دی جبکہ عمان انٹرنیشنل اسٹیڈیم میں اردن نے گرین شرٹس کو 7-0 سے شکست دی۔ پاکستان کے انگلش ہیڈ کوچ اسٹیفن کانسٹینٹائن نے حال ہی میں نیشنل چیلنج کپ کے میچز دیکھے۔ ذرائع کے مطابق جناح اسٹیڈیم میں لگنے والے کیمپ میں نئے چہرے دیکھنے کی قوی امید ہے۔
باخبر ذرائع کے مطابق کے آر ایل کے گلو مین تنویر ممتاز اور ان کے مڈفیلڈر جنید کو بھی کیمپ میں مدعو کیا گیا ہے۔ ذرائع کا کہنا ہے کہ پی اے ایف کے مڈفیلڈر فہیم خان اور ان کے انڈر 16 لیفٹ بیک عبدالرحمان بھی کیمپ میں نظر آئیں گے۔ ذرائع کا کہنا ہے کہ اسٹیفن کانسٹینٹائن نے 32 رکنی فہرست تیار کی ہے جس میں پانچ اہلکار بھی شامل ہیں۔
ذرائع کا کہنا ہے کہ پاکستان فٹ بال ٹیم کے انگلش ہیڈ کوچ اسٹیفن تیسری اے ایف سی نیشنل کوچز کانفرنس میں شرکت کے لیے کوالالمپور گئے تھے جو 9 مئی کو اختتام پذیر ہوئی۔
