پنجاب:آئندہ ہفتے اسموگ خطرناک حد تک پہنچنے کا امکان،نیشنل ڈیزاسٹر مینجمنٹ اتھارٹی
اردو انٹرنیشنل (مانیٹرنگ ڈیسک) پاکستان میں قدرتی آفات سے نمٹنے والے قومی ادارے نیشنل ڈیزاسٹر مینجمنٹ اتھارٹی (این ڈی ایم اے ) نے صوبہ پنجاب کےلئے اسموگ ایڈوائزری جاری کر دی ہے۔این ڈی ایم اے نے امکان ظاہر کیا ہے کہ آئندہ ہفتےوسطی،جنوبی پنجاب میں اسموگ خطرناک حد تک پہنچ سکتی ہے۔ ایڈوائزری کے مطابق گوجرانوالہ، ملتان،لاہور، بہاولپور،فیصل آباد میں اسموگ خطرناک حد تک جاسکتی ہے، سرگودھا،ڈی جی خان،ساہیوال ڈویژن بھی اسموگ کی لپیٹ میں آ سکتے ہیں۔یہ ایڈوائزری سماجی رابطے کی ویب سائٹ ایکس (ٹیوٹر) پر جاری کی گئی ہے.
این ڈی ایم اے سموگ ایڈوائزری
آئندہ ہفتے کے دوران وسطی اور جنوبی پنجاب میں 📍گوجرانوالہ،ملتان،لاہور،بہاولپور،فیصل آباد میں سموگ کا خطرناک حد تک پہنچنے کا امکان ہے۔ سرگودھا،ڈی جی خان،ساہیوال بھی سموگ کی لپیٹ میں آ سکتے ہیں۔ راولپنڈی و اسلام آباد میں بھی سموگ کے اثرات ہو سکتے ہیں pic.twitter.com/LkANeNPhv1— NDMA PAKISTAN (@ndmapk) November 7, 2023
این ڈی ایم اے نے خدشہ ظاہر کیا ہے کہ اسلام آباد، راولپنڈی ڈویژن میں بھی ائیرکوالٹی انڈیکس معتدل سے خراب ہو سکتا ہے۔ایڈوائزری میں عوام سے کہا گیا ہے کہ بیرونی سرگرمیوں کو محدود کریں،باہر جاتے وقت ماسک پہنیں، مقامی ہوا کے معیار کی سطح کے بارے میں آگاہ رہیں، نظام تنفس کو اسموگ کے اثرات سے بچانے کے لیے پانی کا استعمال زیادہ کریں۔
خیال رہے کہ اسموگ کے پیشِ نظر جمعے کو لاہور سمیت پنجاب کے مختلف اضلاع میں چھٹی کا اعلان کر دیا گیا۔نگران وزیراعلیٰ پنجاب محسن نقوی نے 10 نومبر جمعے کو لاہور ڈویژن کے تمام اضلاع ، گوجرانوالہ، وزیر آباد اور حافظ آباد کے اضلاع میں اسموگ کے پیشِ نظر چھٹی کا اعلان کر دیا۔
نیشنل ڈیزاسٹر مینجمنٹ اتھارٹی (این ڈی ایم اے ) نے عوام الناس کی آگاہی کے پیش نظر سموگ سے بچاؤ اور احتیاطی تدابیر کےلئے سوشل میڈیا سائٹ ایکس پر ایک ویڈیو بھی جاری کی ہے ،جس میں کہا گیا ہے کہ محتاط رہیں۔محفوظ رہیں۔
سموگ سے بچاؤ کیلئے احتیاطی تدابیر!!
محتاط رہیں۔محفوظ رہیں۔#ndmapk #PSM #smog #winter pic.twitter.com/ieZphZrKSE— NDMA PAKISTAN (@ndmapk) November 7, 2023
