پی سی بی کا نسیم شاہ کو دی ہنڈریڈ لیگ کے لیے این او سی نہ دینے کا فیصلہ
اردو انٹرنیشنل (اسپورٹس ڈیسک ) تفصیلات کے مطابق ذرائع نے جیو نیوز کو بتایا کہ پاکستان کرکٹ بورڈ (پی سی بی) نے ہفتے کے روز فاسٹ باؤلر نسیم شاہ کو دی ہنڈریڈ کرکٹ لیگ میں شرکت کے لیے نو آبجیکشن سرٹیفکیٹ نہ دینےکا فیصلہ کیا.
اس سے نسیم تقریباً 45 ملین روپے سے محروم ہو جائیں گے کیونکہ انہیں برمنگھم فینکس ٹیم نے £125,000 میں سائن کیا تھا۔
ذرائع کے مطابق یہ فیصلہ ورلڈ ٹیسٹ چیمپئن شپ کے اہم میچوں سے قبل پاکستانی کرکٹر کی جانب سے این او سی کے لیے جمع کرائی گئی درخواست کا جائزہ لینے کے بعد کیا گیا ہے۔
ان کا کہنا تھا کہ ان کی درخواست کو انجری سے بچانے کے لیے خارج کر دیا گیا ہے، کیونکہ وہ قومی ٹیم کے لیے کرکٹ کے تینوں فارمیٹس میں کھیلتے ہیں اور انھیں گزشتہ سال فٹنس کے کچھ چیلنجز کا سامنا کرنا پڑا تھا۔
نسیم نے اکتوبر 2023 میں اپنے کندھے کی چوٹ کے علاج کے لیے کامیاب سرجری کروائی تھی جس کے بعد وہ آئی سی سی ورلڈ کپ 2023 سے باہر ہو گئے تھے۔
اس کے بعد ڈاکٹروں نے نوجوان پیسر کو گراؤنڈ پر واپسی سے قبل چار سے چھ ہفتوں تک آرام کرنے اور بحالی کا مشورہ دیا تھا اس چوٹ نے اسے کم از کم تین سے چار ماہ کے لیے ایکشن سے باہر کردیا تھا۔