جنوبی لبنان میں حزب اللہ کے حملے میں 20 سے زائد اسرائیلی فوجی ہلاک اور زخمی ہوگئے، حزب اللہ
اردو انٹرنیشنل (مانیٹرنگ ڈیسک) لبنانی مزاحمتی گروپ حزب اللہ کا کہنا ہے کہ انہوں نے جنوبی لبنان کے ایک سرحدی گاؤں میں لڑائی کے دوران 20 سے زیادہ اسرائیلی فوجیوں کو ہلاک اور زخمی کیا ہے۔
حزب اللہ نے کہا کہ بھاری راکٹ فائر کے بعد اسرائیلی فوجیوں کی اضافی ہلاکتیں ریکارڈ کی گئیں۔
الجزیرہ کی خبر کے مطابق حزب اللہ نے دعویٰ کیا ہے کہ اس نے جنوبی لبنان کے قصبے عودیسیہ میں دراندازی کی کوشش کرنے والی اسرائیلی افواج کو “جانی نقصان” پہنچایا ہے۔
جھڑپیں جمعے کی شام دیر گئے اس وقت ہوئیں جب حزب اللہ کے جنگجو پیش قدمی کرنے والے اسرائیلی فوجیوں سے آمنے سامنے ہوئے۔
دوسری جانب لبنانی مسلح گروپ حزب اللہ نے ایک “زبردست دھماکہ” کرنے کی اطلاع دی جس نے اسرائیلی افواج کو پیچھے ہٹنے پر مجبور کر دیا، جس کے نتیجے میں ہلاکتوں کی اطلاع بھی دی۔
تاہم اس کے بعد اسرائیلی افواج نے اپنی پیش قدمی دوبارہ شروع کر دی ہے اور جھڑپیں اب بھی جاری ہیں۔
دوسری جانب اس واقعے میں ہلاکتوں کی کوئی سرکاری تعداد جاری نہیں کی گئی ہے اور اسرائیل نے ابھی تک اس حملے کی تصدیق نہیں کی ہے۔
