محسن نقوی کا کراچی کا دورہ، داؤدی بوہرہ برادری کے رہنماؤں سے ملاقات
اردو انٹرنیشنل (مانیٹرنگ ڈیسک) وفاقی وزیر داخلہ محسن نقوی نے کراچی کا دورہ کیا اور داؤدی بوہرہ برادری کے رہنما سیدنا مفضل سیف الدین سے برہانی پیلس میں ملاقات کی۔
انہوں نے سولجر بازار میں شاہ شہیدان امام بارگاہ کا بھی دورہ کیا اور انتظامات کا جائزہ لیا۔
سیدنا مفضل سیف الدین سے ملاقات کے دوران ان کے صاحبزادے شہزادہ حسین برہان الدین بھی موجود تھے۔ وزیر داخلہ نےسیدنا مفضل سیف الدین کے لیے نیک خواہشات کا اظہار کرتے ہوئے کہا، ہم آپ کو پاکستان میں کھلے دل سے خوش آمدید کہتے ہیں۔ آپ کی آمد ہمارے لیے باعث اعزاز ہے۔ ہمارا آپ کے ساتھ احترام اور تعریف کا رشتہ ہے جو ہمیشہ یونہی رہے گا۔ انہوں نے مزید کہا کہ داؤدی بوہرہ برادری ایک پرامن اور محبت کرنے والی کمیونٹی ہے۔
سیدنا مفضل سیف الدین نے داؤدی بوہرہ برادری سے متعلق مسائل کو حل کرنے پر وزیر داخلہ محسن نقوی کا شکریہ ادا کیا اور انہیں ایک خوبصورت چادر اور تبرک پیش کیا۔
بعد ازاں وزیر داخلہ نے سولجر بازار میں شاہ شہیدان امام بارگاہ کا دورہ کیا اور سیکیورٹی انتظامات کا جائزہ لیا۔ انہوں نے مولانا آیت اللہ عقیل الغراوی اور سابق وزیر اعلیٰ سندھ جسٹس (ر) مقبول باقر سے بھی ملاقات کی۔ وزیر داخلہ نے امام بارگاہ میں سیکیورٹی اور دیگر انتظامات پر اطمینان کا اظہار کیا۔
وزیر داخلہ نے کہا کہ وفاقی حکومت محرم کے دوران امن و امان برقرار رکھنے کے لیے تمام صوبوں سے رابطے میں ہے۔ انہوں نے مزید کہا کہ محرم کے دوران امن و امان کو یقینی بنانے کے لیے تمام صوبوں کو ضروری وسائل فراہم کیے جا رہے ہیں۔
مولانا آیت اللہ عقیل الغراوی اور جسٹس (ر) مقبول باقر نے امن و سلامتی کو یقینی بنانے کے لیے بہترین انتظامات پر وزیر داخلہ کا شکریہ ادا کیا۔
