نائب وزیراعظم سے سعودی عرب اور چین کے سفیروں کی ملاقات
اردو انٹرنیشنل (مانیٹرنگ ڈیسک) نائب وزیراعظم اور وزیر خارجہ سینیٹر محمد اسحاق ڈار سے چین کے سفیر جیانگ زیڈونگ نے جمعہ کو ملاقات کی۔
دفتر خارجہ کے مطابق ملاقات میں پاک چین ہمہ موسمی سٹریٹجک کوآپریٹو پارٹنرشپ کا اعادہ کرتے ہوئے فریقین نے وزیراعظم کے دورہ چین کے دوران طے پانے والے دوطرفہ اتفاق رائے کو عملی جامہ پہنانے اور پاک چین دوستی کو مزید مضبوط بنانے اور سی پیک کو اپ گریڈ کرنے کے عزم کا اظہار کیا۔
جبکہ سعودی عرب کے سفیر نواف بن سعید احمد المالکی نے بھی نائب وزیراعظم و وزیر خارجہ سینیٹر محمد اسحاق ڈار سے ملاقات کی۔ انہوں نے دو طرفہ تعاون اور باہمی دلچسپی کے اہم شعبوں پر تبادلہ خیال کیا۔
دونوں رہنماؤں نے دونوں برادر ممالک کے درمیان اسٹریٹجک شراکت داری کو مزید مضبوط بنانے کے عزم کا اعادہ کیا۔
اس موقع پر نائب وزیراعظم اور وزیر خارجہ نے حج کے دوران حجاج کو دی جانے والی سہولیات کو بھی سراہا۔
