اردو انٹرنیشنل اسپورٹس ویب ڈیسک تفصیلات کے مطابق مانچسٹر سٹی کے پریمیئر لیگ کے مالیاتی قوانین کو توڑنے کے 115 الزامات کی سماعت آج یعنی پیر کو شروع ہونے والی ہے۔

سٹی پر الزام لگایا گیا تھا کہ اس نے 2009 سے 2018 تک پریمیئر لیگ کے مالیاتی قوانین کو توڑا اور فروری 2023 میں چار سال کی تحقیقات کے بعد سٹی کو ایک آزاد کمیشن کے پاس بھیج دیا گیا۔ جبکہ سٹی ان الزامات کی سختی سے تردید کرتا ہے اور کہتا ہے کہ ان کے پاس اپنی بے گناہی ثابت کرنے کے لیے مضبوط ثبوت موجود ہیں۔ دوسری جانب پریمیئر لیگ کا کہنا ہے کہ سٹی اپنی آمدنی اور اخراجات کے بارے میں درست مالی معلومات فراہم کرنے میں ناکام رہا، جس میں اسپانسرشپ سے حاصل ہونے والی رقم اور دیگر اخراجات شامل ہیں۔

جب پریمیئر لیگ نے مانچسٹر سٹی کے خلاف تحقیقات شروع کیں تو کلب نے کہا کہ یہ الزامات بالکل غلط ہیں۔ انہوں نے دعویٰ کیا کہ یہ معلومات، جو سب سے پہلے جرمن اخبار ڈیر اشپیگل نے شائع کی تھیں، غیر قانونی ہیکنگ سے آئی تھیں اور انہیں سیاق و سباق سے ہٹ کربیان کیا گیا تھا۔ 2008 میں ابوظہبی یونائیٹڈ گروپ کی طرف سے خریدے جانے کے بعد سے، سٹی نے آٹھ لیگ ٹائٹل، کئی کپ اور چیمپئنز لیگ جیتے ہیں۔

سٹی کے مینیجر پیپ گارڈیولا نے جمعہ کو بتایا کہ سماعت جلد شروع ہو رہی ہے اور انہیں امید ہے کہ اسے جلد حل کر لیا جائے گا۔ وہ حتمی فیصلے کا منتظر ہے اور کہا کہ اگرچہ نتائج کے بارے میں بہت سی افواہیں اور آراء ہو سکتی ہیں، لیکن وہ اس اصول پر یقین رکھتے ہیں کہ جب تک جرم ثابت نہ ہو جائے اس وقت تک ہر کوئی بے قصور ہے۔