سدھو موسی والا کے قتل کا ماسٹر مائنڈ گولڈی برار کیلیفورنیا میں گینگ وار میں مارا گیا: رپورٹس
اردو انٹرنیشنل (مانیٹرنگ ڈیسک) بھارتی میڈیا کی غیر مصدقہ اطلاعات کے مطابق کیلیفورنیا میں مبینہ گینگ وار کے درمیان پنجابی گلوکار سدھو موسی والا کے قتل میں مبینہ طور پر ملوث ایک ‘گینگسٹر’ ستویندر سنگھ عرف گولڈی برار کو امریکہ میں گولی مار کر ہلاک کر دیا گیا ہے۔
نیوز 18 کی ایک رپورٹ کے مطابق، گینگسٹر کو منگل (30 اپریل) کیلیفورنیا کے فیئرمونٹ اور ہولٹ ایونیو میں مقامی وقت کے مطابق شام 5:30 بجے گولی مار کر ہلاک کر دیا گیا۔ 1994 میں پیدا ہونے والے گولڈی برار کا تعلق پنجاب کے سری مکتسر صاحب سے ہے اور نوٹیفکیشن کے مطابق برامپٹن، کینیڈا میں مقیم تھے۔
بھارتی میڈیا رپورٹس کے مطابق گولڈی برار اپنے گھر کے باہر کھڑے تھے کہ نامعلوم حملہ آوروں نے ان پر فائرنگ کردی اور موقع سے فرار ہوگئے۔
مجموعی طور پر دو افراد کو قریبی اسپتال لے جایا گیا، جہاں گولڈی برار کو مردہ قرار دے دیا گیا۔
بھارتی میڈیا ٹائمز آف انڈیا کے ایک حصے نے ابتدا میں گولڈی برار کے قتل کی خبر شائع کی لیکن بعد میں اس خبر کو اپنی ویب سائٹ سے ہٹا دیا۔ جبکہ ہندوستان کے دیگر ذرائع ابلاغ نے امریکی رپورٹس کا حوالہ دیتے ہوئے بتایا کہ پنجابی ریپر سدھو موسی والا کے قتل کے پیچھے موجود گینگسٹر کو گولی مار کر ہلاک کر دیا گیا۔
ڈلہ لکھبیر گینگ، جسے ارشدیپ سنگھ عرف ارش ڈلہ اور لکھبیر سنگھ سندھو عرف لنڈا چلاتے ہیں، طویل عرصے سے قانون نافذ کرنے والے اداروں کے لیے ایک کانٹا ہے۔ اس کے بدنام ممبران کینیڈا کی سرزمین سے کام کر رہے ہیں، بھارت میں مجرمانہ سرگرمیوں کی منصوبہ بندی کر رہے ہیں۔
واضح رہے کہ پنجابی گلوکار سدھو موسی والا کو 29 مئی 2022 کو پنجاب کے ضلع مانسا کے گاؤں جواہرکے میں گولی مار کر ہلاک کر دیا گیا تھا۔ اس وقت گولڈی برار نے موسی والا کے قتل کی ذمہ داری قبول کی تھی۔