ایشیائی ترقیاتی بینک کا پاکستان کے اصلاحاتی ایجنڈے کی حمایت کا اعلان
اردو انٹرنیشنل (مانیٹرنگ ڈیسک) ایشیائی ترقیاتی بینک (اے ڈی بی) کے صدر مساتسوگو اسکاوا نے پاکستان کے اصلاحاتی ایجنڈے کی حمایت کا اعلان کردیا۔
وزارت اقتصادی امور کی جانب سے اعلامیہ جاری کیا گیا ہے جس میں بتایا گیا ہے کہ صدر ایشیائی ترقیاتی بینک نے وزیر اقتصادی امور کی زیر قیادت پاکستانی وفد کے ساتھ ملاقات کی۔
اعلامیہ کے مطابق ملاقات میں اے ڈی بی کی پاکستان کی حمایت کی تصدیق کی گئی ہے جب کہ صدر اے ڈی بی نے پاکستان میں معاشی استحکام کے لیے سخت اقدامات کی تعریف کی۔
اعلامیہ میں کہا گیا ہے کہ وزیر اقتصادی امور نے پاکستان کے لیے ایشیائی ترقیاتی بینک کی فراخدلانہ حمایت کی تعریف کی جب کہ اے ڈی بی کی طویل المدتی حمایت پر وزیر چیمہ نے اظہار تشکر کیا۔
انہوں نے اے ڈی بی کی جانب سے اضافی 100 بلین ڈالر کے حصول کی تعریف کی جب کہ وزیر چیمہ نے اے ڈی بی سے وسائل کو موسمیاتی اقدامات اور کمزور ممالک کے لیے استعمال کرنے کی درخواست کی۔
اعلامیے میں کہا گیا ہے کہ احد چیمہ نے ایشین انفراسٹرکچر انویسٹمنٹ بینک اور یورپی انویسٹمنٹ بینک کی سینئر قیادت کے ساتھ ملاقاتیں بھی کیں تاکہ پاکستان میں ان کے جاری ترقیاتی پورٹ فولیوز اور مستقبل میں سپورٹ کے لیے ترجیحی شعبوں پر تبادلہ خیال کیا جا سکے، انہوں نے دوطرفہ ترقیاتی شراکت داروں بشمول برطانیہ، جرمنی اور امریکا کے ساتھ ملاقاتیں کیں تاکہ ٹیکس کے نظام کی ڈیجیٹلائزیشن کے خاتمے، توانائی کے بنیادی ڈھانچے اور موسمیاتی تبدیلی سمیت اہم ترجیحی شعبوں میں دوطرفہ تعاون کو مزید مضبوط کیا جا سکے۔
یہ بھی پڑھیں
امریکہ میں پاکستانی سفارتخانے میں موسیقی اور لذیز کھانے ہزاروں لوگوں کی توجہ کا مرکز بن گئے