پاکستان میں سابق فوجی افسران کی گرفتاریاں، پینٹاگون کا ردعمل
اردو انٹرنیشنل (مانیٹرنگ ڈیسک) پاکستان میں سابق فوجی افسران کی گرفتاریوں پر امریکہ محکمہ دفاع ( پینٹاگون ) کا ردعمل سامنے آگیا۔
تفصیلات کے مطابق امریکہ محکمہ دفاع پینٹاگون کی پریس سیکریٹری سبرینا سنگھ نے سابق فوجی افسران کی گرفتاریوں کو پاکستان کا اندرونی معاملہ قرار دے دیا۔
سبرینا سنگھ کا کہنا تھا کہ گرفتاریوں سے متعلق رپورٹس سے آگاہ ہیں، امریکا علاقائی استحکام اور باہمی مقاصد کی حمایت کے لیے پاکستان کے ساتھ مل کر کام کے لیے پرعزم ہے۔
پینٹاگون کی پریس سیکریٹری نے مزید کہا کہ امریکا پاکستان کیساتھ باہمی مفادات کی بنیاد پر فوجی اور سویلین رہنماؤں کے ساتھ بات چیت کرتا ہے۔
یاد رہے سابق ڈی جی آئی ایس آئی لیفٹیننٹ جنرل ریٹائرڈ فیض حمید کے فیلڈ جنرل کورٹ مارشل کے بعد مزید تین ریٹائرڈ فوجی افسران کو فوجی تحویل میں لے لیا گیا ہے۔
آئی ایس پی آر نے گرفتاری کی تصدیق کرتے ہوئے کہا تھا کہ مزید تین ریٹائرڈ فوجی افسران کو ملٹری ڈسپلن کی خلاف ورزی پرفوجی تحویل میں لیا گیا، ان ریٹائرڈ افسران اوران کے ساتھیوں کے خلاف بھی تفتیش جاری ہے، جو سیاسی مفادات کیلئے ملی بھگت کرکے عدم استحکام کو ہوا دے رہے ہیں