پاکستان: شہریوں کی ٹارگٹ کلنگ میں ملوث بھارتی ایجنٹ پکڑےگئے،سیکرٹری خارجہ
اردو انٹرنیشنل (مانیٹرنگ ڈیسک)سیکریٹری خارجہ سائرس سجاد نے پاکستانی سرزمین پر ہونے والی ٹارگٹ کلنگ میں بھارت کے ملوث ہونے کے ثبوت پیش کریے ہیں۔
اسلام آباد میں پریس کانفرنس کرتے ہوئے ان کا کہنا تھا کہ بھارت پاکستانی سرزمین پر پاکستانیوں کے قتل میں ملوث ہے، بھارتی ایجنٹ دہشت گردی، قتل وغارت اور دیگر وارداتوں میں ملوث ہیں، ہم بھارتی ایجنٹس یوگیش کمار اور اشوک کمار کی تفصیلات جاری کررہے ہیں۔
قاضی 2023 میں شاہد لطیف اور محمد ریاض کے نام سے دو پاکستانیوں کی ہلاکت کا حوالہ دے رہے تھے۔ دوسرے ممالک میں ہونے والے قتل میں بھارتی حکومت کے ملوث ہونے کے حوالے سے اسی طرح کے الزامات گزشتہ سال امریکہ اور کینیڈا نے بھی لگائے تھے۔
🔴LIVE: Media Briefing by Foreign Secretary Muhammad Syrus Sajjad Qazi https://t.co/cIeQ1Y6BNl
— Spokesperson 🇵🇰 MoFA (@ForeignOfficePk) January 25, 2024
سیکرٹری خارجہ نے بتایا کہ گزشتہ سال پاکستانی شہری محمد ریاض کو بھی راولاکوٹ میں مسجد میں قتل کیا گیا تھا، بھارتی ایجنٹ نے اجرتی قاتل کے ذریعے محمد ریاض کو قتل کرایا، سکیورٹی فورسز نے اجرتی قاتل کو گرفتار کیا جس نے جرم کا اعتراف کیا،بھارتی ایجنٹ دہشت گردی اور دیگر وارداتوں میں بھی ملوث پائےگئے۔
انہوں نے بتایا کہ شہری محمد ریاض کو راولاکوٹ کی مسجد میں قتل کرنیوالے عبداللہ علی کو ائیرپورٹ پر گرفتار کیا گیا، وہ بیرون ملک فرار ہو رہا تھا، اس کو بھارتی ایجنٹ اشوک کمار نے سوشل میڈیا کے ذریعے رابطہ کیا، محمد عبداللہ علی کو بیرون ممالک اکاؤنٹس سے ادائیگیاں کی گئی، محمد عبداللہ علی اور ان کے ساتھیوں، آلہ کاروں کو مختلف شہروں سے گرفتار کیا گیا۔
ڈان نیوز کے مطابق 09 ستمبر 2023 کو آزاد کشمیر کے شہر راولاکوٹ کی ایک مسجد میں کالعدم جماعت الدعوۃ سے وابستہ ایک سابق کارکن کو گولی مار کر قتل کر دیا گیا تھا۔محمد ریاض عرف ابو قاسم کشمیری صابر شہید اسٹیڈیم کے قریب واقع القدس مسجد میں فجر کی نماز ادا کر رہے تھا کہ حملہ آوروں نے ان پر چار گولیاں چلائیں اور وہ موقع پر ہی دم توڑ گیا۔
11 اکتوبر کو نماز فجر کے دوران ڈسکہ کی مسجد میں ٹارگٹڈ حملے میں ایک نمازی، کالعدم تنظیم سے تعلق رکھنے والا مذہبی کارکن شاہد لطیف اور ان کا سیکیورٹی گارڈ مارا گیا تھا۔مقتول کارکن مولانا شاہد لطیف کے سیکیورٹی گارڈ ذوالفقار علی نے بتایا تھا کہ 6 نامعلوم افراد موٹر سائیکلوں پر منڈیکے گورایا چوک میں واقع نوری مدینہ مسجد پہنچے جن میں سے تین نماز میں شامل ہوگئے۔
انہوں نے کہا تھا کہ بعد ازاں گولیوں کی آوازیں سنی گئیں اور چند ہی لمحات میں حملہ آور جائے وقوع سے فرار ہوگئے، مسلح ملزمان نے مجھ پر بھی گولی چلائی لیکن میں محفوظ رہا۔
