ساحر علی بگا نے علی ظفر کی مداخلت پر راحت فتح علی خان کو منافق کہنے پر معذرت کر لی
اردو انٹرنیشنل ( مانیٹرنگ ڈیسک) حال ہی میں پاکستانی گلوکار ساحر علی بگا نے راحت فتح علی خان کے خلاف پوسٹ کی تھی، جس پر اب معروف گلوکار اور اداکار علی ظفر بھی میدان میں آگئے ہیں۔
علی ظفر کی جانب سے پاکستان میوزک انڈسٹری کے دو معروف گلوکاروں کے درمیان صلح کی ایک کوشش کے طور پر قدم اٹھایا گیا ہے۔
تفصیلات کے مطابق گزشتہ روز سروں کے بادشاہ اور مایہ ناز موسیقار راحت فتح علی خان کو ’منافق‘ کہتے ہوئے سخت الفاظ استعمال کرنے کے بعد گلوکار ساحر علی بگا نے ساتھی گلوکار علی ظفر کے کہنے پر معذرت کرلی۔
سوشل میڈیا پر ساحر علی بگا کی پوسٹ وائرل ہوئی تھی جس میں وہ غیر اخلاقی الفاظ استعمال کرتے ہوئے راحت فتح علی خان پر شدید تنقید کررہے تھے تاہم انہوں نے اس تنقید کی کوئی وجہ نہیں لکھی۔
انہوں نے لکھا تھا کہ ’خدا کی لعنت ہو منافق پر‘ اور پھر لکھا کہ ’راحت فتح ۔۔۔ خان درندہ صفت ہونے کے ساتھ منافق بھی ہے‘۔
تاہم ساحر علی بگا نے اپنی یہ اسٹوری فوراً ہی ڈیلیٹ کردی لیکن اسٹوری کے اسکرین شاٹس سوشل میڈیا وائرل ہوچکے ہیں۔
پوسٹ وائرل ہونے کے بعد ساتھی گلوکار علی ظفر نے فیس بک پر ساحر علی بگا کو ٹیگ کرتے ہوئے لکھا کہ پیارے بھائی ساحر علی بگا، میں آپ سے درخواست کروں گا، خدارا رمضان کا احترام کریں۔
علی طفر نے مزید لکھا ’جیسا کہ آپ نے پہلے اپنی پوسٹ میں ذکر بھی کیا کہ ’اپنی زبان کی حفاظت کرو، دوسروں پر انگلی نہ اٹھاؤ‘. ’ہم سب میں خامیاں ہیں، اللہ ہمیں ہدایت دے اور ہم سب پر سلامتی ہو ، آمین‘۔
اس پر ساحر علی بگا نے ردعمل دیتے ہوئے لکھا کہ ’ شکریہ علی ظفر ،امیں رمضان المبارک کے دوران کسی کے بارے میں کوئی معلومات یا سچائی شیئر کرنے کے لیے معذرت خواہ ہوں، اب میں اور اس پوسٹ کو ڈیلیٹ کررہا ہوں‘.