اردو انٹرنیشنل اسپورٹس ویب ڈیسک تفصیلات کے مطابق فرانس کے اسٹار فٹبالر امباپے باقاعدہ طور پر معروف ہسپانوی فٹبال کلب ریال میڈرڈ کا حصہ بن گئے۔
منگل کو اسپین کے دارالحکومت میڈرڈ کے فٹ بال اسٹیڈیم میں 80 ہزار مداحوں کے سامنے شمولیتی تقریب سے خطاب کرتے ہوئے امپابےکا کہنا تھا کہ میں کئی سالوں تک ریال میڈرڈ کی طرف سے کھیلنےکا خواب دیکھتا آرہا ہوں اور آج میرا بچپن کا یہ خواب پورا ہوگیا۔
امباپے کا کہنا تھا کہ میں پڑھائی میں اچھا نہیں تھا تاہم اسپینش سیکھنے کے لیے 100 فیصد کوشش کروں گا، میرا اس کلب میں ہونا میرے لیے بڑی اہمیت رکھتا ہے، اب میرا خواب ہے کہ میں اس کلب کو مزید اونچے مقام پر لے کر جاؤں اور اس کے لیے میں پوری کوشش کروں گا۔
خیال رہےکہ ہسپانوی فٹبال کلب نےگزشتہ ماہ اعلان کیا تھا کہ فرانسیسی اسٹار فٹبالر امباپےکلب میں شمولیت پر رضامند ہوگئے ہیں۔
فرانسیسی خبر ایجنسی کے مطابق 25 سالہ امباپے نے ریال میڈرڈ کے ساتھ 5 سالہ معاہدہ کیا ہے، ان کا فرانسیسی کلب پیرس سینٹ جرمین سے فری تبادلہ ہوا ہے کیونکہ اس کلب سے ان کا معاہدہ ختم ہوگیا تھا۔ امباپے نے پیرس سینٹ جرمین کے ساتھ معاہدے میں توسیع سے انکار کیا تھا جس کے بعد سے کلب اور فٹبالر کے درمیان دوریاں پیدا ہونے کی اطلاعات تھیں۔
رپورٹ کے مطابق امباپےکا ریال میڈرڈ کے ساتھ ایک کروڑ 50 لاکھ یورو سالانہ کا معاہدہ ہوا ہے۔
یاد رہے کہ امباپے نے 19 سال کی عمر میں 2018 کا فیفا ورلڈکپ فائنل کھیلا تھا جہاں ان کے گول نے فرانس کو ورلڈ چیمپئن بنانے میں اہم کردار ادا کیا تھا، وہ برازیلی لیجنڈ پیلے کے بعد 20 سال سے کم عمر دوسرے کھلاڑی تھے جنہوں نے فائنل میں گول اسکور کیا۔
2022 کے قطر فیفا ورلڈکپ میں ارجنٹینا اور فرانس کے مابین کھیلےگئے فائنل میں جب میسی کی قیادت میں ارجنٹینا کی ٹیم یکطرفہ طور پر میچ جیت رہی تھی تب امباپے نے برق رفتاری سے کھیلتے ہوئے سب کو ششدر کردیا تھا اور شاندا ہیٹ ٹرک اسکور کرکے فرانس کو فتح کے قریب کردیا تھا۔ ایونٹ میں سب سے زیادہ 8 گول اسکور کرنے پر انہیں گولڈن بوٹ ایوارڈ دیا گیا تھا۔
