میں صرف عوام کی جانب دیکھ رہا ہوں،لاڈلہ بنو ں گا تو صرف عوام کا لاڈلہ بنوں گا،بلاول بھٹو
پاکستان پیپلز پارٹی کے چیئرمین بلاول بھٹو زرداری نے ایبٹ آباد میں کنونشن سے خطاب کرتے ہوئے کہا کہ آئندہ انتخابات میں کامیاب ہوکر عوامی حکومت بنائیں گے اور یہ حکومت قائد عوام شہید ذوالفقار علی بھٹو کے منشور اور شہید محترمہ بینظیر بھٹو کے نظریئے کے مطابق چلے گی، کیونکہ آج کے مسائل کا حل پاکستان پیپلز پارٹی کے منشور میں ہے۔
بلاول بھٹو نے کہا کہ میرا پاکستان کے عوام سے وعدہ ہے اگر آپ مجھے موقع دیں گے تو میں کبھی بھی آپ کو مایوس نہیں کرونگا، ہماری گواہی ہماری تاریخ ہے کیونکہ پاکستان پیپلز پارٹی کی حکومت عوام کی خدمت کرتی ہے اور انشاء ﷲ ہماری پوری توجہ نوجوانوں کو روزگار دینے، غریب عوام کا خیال رکھنے، غربت اور مہنگائی کا مقابلہ کرنے پر مرکوز ہوگی۔
چیئرمین پیپلزپارٹی نے کہا کہ میں صرف پاکستان کے عوام کی جانب دیکھ رہا ہوں، لاڈلہ بننا ہے تو صرف عوام کا لاڈلہ بننا ہے۔ صرف اور صرف عوام کے پاس یہ حق ہے کہ وہ فیصلہ کریں کہ ان کا وزیراعظم کون ہوگا باقی کسی اور کے پاس یہ حق نہیں ہے۔انہوں نے کہا کہ پاکستان پیپلز پارٹی ہمیشہ انتخابات کیلئے تیار ہوتی ہے اور ہم عوام پر اعتماد کرتے ہیں اور میری باقی جماعتوں سے بھی درخواست ہے کہ آپ بھی عوام پر اعتماد کرکے پاکستان کا مستقبل اور انتخابات عوام پر چھوڑیں۔
بلاول بھٹو ن نے کہا کہ جو کھیل اس ملک اور جمہوریت کے ساتھ 70 سالوں سے چلتا آرہا ہے ہمیں اب اس کھیل کو ختم کرنا پڑے گا۔