پشاور ہائیکورٹ نے الیکشن کمیشن سمیت فریقین کو توہین عدالت کے نوٹس جاری کر دیے
اردو انٹرنیشنل (مانیٹرنگ ڈیسک) پی ٹی آئی کی توہین عدالت کی درخواست پر الیکشن کمیشن کو نوٹس جاری کر دئیے گئے۔ پشاورہائیکورٹ میں الیکشن کمیشن کیخلاف پی ٹی آئی کی توہین عدالت درخواست پر سماعت ہوئی۔ الیکشن کمیشن سمیت تمام فریقین کو توہین عدالت نوٹسز جاری کردیئے۔پشاورہائیکورٹ نے 16 جنوری تک فریقین سے جواب طلب کرلیا۔
پشاور ہائیکورٹ نے الیکشن کمیشن کے خلاف توہین عدالت کی درخواست سماعت کے لیے مقرر کی تھی جس کے لیے عدالت کا 2 رُکنی بینچ تشکیل دیا گیا تھا، بینچ میں جسٹس شکیل احمد اور جسٹس وقار احمد شامل تھے جنہوں نےآج بروز جمعہ درخواست پر سماعت کریں گے۔
ذرائع کا کہنا ہے کہ انتخابی نشان بحال نہ کرنے اور سرٹیفکیٹ فوری طور پر ویب سائٹ پر اپلوڈ نہ کرنے کے معاملے پر تحریک انصاف نے الیکشن کمیشن کے خلاف پشاور ہائی کورٹ میں توہین عدالت کی درخواست دائر کی ہے، پاکستان تحریک انصاف کی جانب سے پشاور ہائیکورٹ میں دائر توہین عدالت کی درخواست میں مؤقف اپنایا گیا ہے کہ عدالتی احکامات کے باوجود الیکشن کمیشن نے ابھی تک پی ٹی آئی کو بلے کے نشان کا سرٹیفیکٹ جاری نہیں کیا، جو توہین عدالت ہے۔