ایس سی او اجلاس: اسلام آباد اور راولپنڈی میں 3 روزہ سرکاری تعطیل کا اعلان
اردو انٹرنیشنل (مانیٹرنگ ڈیسک) وفاقی حکومت نے شنگھائی تعاون تنظیم (ایس سی او) کے سربراہی اجلاس کے پیش نظر اسلام آباد اور راولپنڈی میں 3 روز کے لیے عام تعطیل کا اعلان کردیا۔
ذرائع کے مطابق کابینہ ڈویژن نے 14، 15 اور 16 اکتوبر کو راولپنڈی، اسلام آباد میں تعطیل کا نوٹی فکیشن جاری کیا۔
نوٹیفکیشن کے مطابق کانفرنس کے انعقاد میں سہولت کے لیے جڑواں شہروں میں تین روز کی عام تعطیل کا اعلان کیا گیا۔
واضح رہے کہ شنگھائی تعاون تنظیم کا سربراہی اجلاس 15 اور 16 اکتوبر کو اسلام آباد میں منعقد ہو گا جس میں بھارتی وزیر خارجہ سبرامنیم جے شنکر سمیت دیگر ممالک کے اعلیٰ سطح کے وفود شرکت کریں گے۔
ایس سی او سمٹ کے دوران وفاقی دارالحکومت میں فوج آرٹیکل 245 کے تحت سیکیورٹی کی ذمہ داری سنبھالے گی۔