سعودی عرب آزاد فلسطینی ریاست کے قیام تک اسرائیل سے کوئی سفارتی تعلقات قائم نہیں کرے گا, سعودی وزیر خارجہ
سعودی عرب نے اعلان کر دیا کہ جب تک آزاد فلسطینی ریاست قائم نہیں ہوگی تب تک اسرائیل کے ساتھ سفارتی تعلقات ممکن نہیں۔ سعودی وزیر خارجہ نے اپنے ایک بیان میں کہا کہ فلسطین کے مسئلہ پر سعودی حکومت کا مؤقف ہمیشہ ثابت قدم رہا ہے۔
سعودی وزیر خارجہ نے غزہ میں جاری اسرائیلی مظالم کو روکنے، غزہ سے اسرائیلی فوجیوں کا انخلا اور فلسطینی عوام کو ان کے جائز حقوق ملنے کی ضرورت پر زور دیا۔
بیان میں بتایا گیا ہے کہ سعودی عرب نے اپنا موقف امریکی انتظامیہ کو پیش کر دیا ہے جس میں کہا گیا ہے کہ سعودی عرب اسرائیل کے ساتھ اس وقت تک کوئی سفارتی تعلقات قائم نہیں کرے گا جب تک 1967 کی سرحدوں کے مطابق ایک آزاد فلسطینی ریاست کو تسلیم نہیں کیا جاتا جس کا دارالحکومت مشرقی یروشلم ہوگا۔
دوسری جانب امریکی وزیر خارجہ اسرائیل کے دورہ پر پہنچ گئے ہیں . جہاں وہ خطے کی بڑھتی کشیدگی سے متعلق بات چیت کے لیے اسرائیلی وزیراعظم نتن یاہو سے ملاقات کریں گے۔