بھارت نے 276 شہریوں کی وطن واپسی کے بعد مشتبہ انسانی اسمگلنگ کی تحقیقات شروع کردیں
اردو انٹرنیشنل (مانیٹرنگ ڈیسک) ہندوستانی ریاست گجرات کے حکام نے بدھ کے روز میڈیا کو بتایا کہ بھارت نے اس بارے میں تحقیقات کا آغاز کیا ہے کہ کس طرح 303 ہندوستانی ایک چارٹرڈ فلائٹ پر سوار ہوئے جو کہ مشتبہ انسانی اسمگلنگ کی وجہ سے گزشتہ ہفتے فرانس میں گراؤنڈ کی گئی تھی۔
اطلاع کے مطابق ، فرانسیسی حکام نے جمعہ کو ہوائی جہاز کو شمال مشرقی فرانس کے وٹری ہوائی اڈے پر ایندھن بھرنے والے اسٹاپ اوور سے نکاراگوا کی اپنی درج شدہ منزل کے لیے پرواز کرنے سے روک دیا۔ اس نے متحدہ عرب امارات (یو اے ای) سے اڑان بھری تھی جس میں مسافروں میں سے 11 نابالغ تھے، جن میں سے 276 کو ہندوستان واپس بھیجا گیا تھا ۔
حکام نے بتایا کہ جہاز میں سوار بہت سے ہندوستانیوں کا تعلق گجرات سے تھا۔
گجرات پولیس کے ایک سینئر اہلکار سنجے کھرات نے کہا کہ حکام نے ریاست سے 21 افراد کے نام اور پتے حاصل کر لیے ہیں جو فلائٹ میں تھے اور تفتیش کار اس بات کا تعین کرنے کی کوشش کر رہے ہیں کہ ان کے سفر میں کس نے سہولت فراہم کی۔
یہ پرواز رومانیہ کی لیجنڈ ایئر لائنز نے چلائی تھی۔ اس کی وکیل للیانا باکیوکو نے معاہدے کی رازداری کا حوالہ دیتے ہوئے اس کلائنٹ کا نام بتانے سے انکار کر دیا جس نے طیارہ چارٹر کیا تھا۔
واضح رہے کہ فرانس میں انسانی اسمگلنگ کے سلسلے میں روکے گئے ایک چارٹر طیارے کو ، جس پر تین سو سے زیادہ بھارتی باشندے سوار تھے، 276 مسافروں کے ساتھ بھارت واپس بھیج دیا گیا تھا۔
خبررساں ادارے ایسوسی ایٹڈ پریس نے اپنی ایک رپورٹ میں بتایا ہے کہ نکارا گوا جانے والے لیجنڈ ایئرلائنز کے اے 340 طیارے کو، جس پر کوئی نشان نہیں تھا، چار روز تک فرانس کی شمپین کاؤنٹی کے وٹری نامی دیہی ایئر پورٹ پر روکے جانے کے بعد ، پیر کے روز مسافروں اور عملے سمیت پرواز کرتے ہوئے دیکھا گیا۔
مقامی انتظامیہ نے بتایا ہے کہ طیارے کے 303 مسافروں میں سے 276 کو بمبئی واپس بھیج دیا گیا تھا جب کہ باقی ماندہ 25 مسافروں نے فرانس میں سیاسی پناہ کی درخواست کی ، جنہیں پیرس کے چارلس ڈیگال ایئرپورٹ پر سیاسی پناہ کے خواہش مندوں کے لیے قائم خصوصی زون میں منتقل کر دیا گیا ہے۔