پٹرولیم مصنوعات کی قیمتوں میں تبدیلی
حکومت نے پٹرولیم مصنوعات کی قیمتوں میں تبدیلی کا اعلان کر دیا ہے، نئی قیمتوں کا اطلاق آج رات 12 بجے سے ہو گیا ہے۔ نگران وفاقی حکومت نے آئندہ 15 روز کیلئے پٹرول کی موجودہ قیمت کو برقرار رکھنے کا فیصلہ کیا ہےجبکہ نگران حکومت نے پٹرول سستا کرنے کی اوگرا کی سمری مسترد کر دی۔
لیکن دیگر پٹرولیم مصنوعات کی قیمتوں میں کمی کر دی گئی ہے۔ یکم دسمبر سے ڈیزل 7 روپے، لائٹ اسپیڈ ڈیزل 4 روپے 52 پیسے، مٹی کا تیل 3 روپے 82 پیسے سستا کر دیا گیا ہے۔ یوں پٹرول کی قیمت 281 روپے 34 پیسے، ڈیزل کی نئی قیمت 289 روپے 71 پیسے، لائٹ اسپیڈ ڈیزل کی نئی قیمت 175 روپے 93 پیسے، مٹی کے تیل کی نئی قیمت 201 روپے 16 پیسے مقرر کر دی گئی۔
ذرائع کے مطابق اوگرا نے پٹرولیم مصنوعات کی قیمتوں میں کمی کی سمری پیٹرولیم ڈویژن کو بھیجی تھی۔ سمری میں پیٹرول کی قیمت میں 7 روپے37 پیسے اور ہائی سپیڈ ڈیزل کی قیمت میں 6 روپے 85 پیسے کمی کی سفارش کی گئی۔ اسی طرح مٹی کا تیل فی لیٹر 2 روپے 82 پیسے اور لائٹ اسپیڈ ڈیزل کی قیمت میں 4 روپے تک سستا کرنے کی سفارش بھی کی گئی۔ پٹرولیم مصنوعات کی قیمتوں میں آئندہ 15 روز کے لیے کمی کرنے کی سفارش کی گئی۔
واضح رہے کہ گزشتہ دو ہفتوں کے دوران ناصرف پاکستان میں ڈالر کی قدر میں کمی ہوئی، ساتھ ساتھ عالمی مارکیٹ میں بھی تیل کی قیمتوں میں نمایاں کمی کا رجحان دیکھا گیا۔ اس کے باوجود نگران حکومت نے دسمبر کے پہلے 15 ایام کیلئے پٹرول کی قیمت کم نہ کرنے کا فیصلہ کیا ہے۔