چیئرمین محسن نقوی کی وہیل چیئر کرکٹ ٹیم سے ملاقات
اردو انٹرنیشنل (اسپورٹس ڈیسک) تفصیلات کے مطابق پاکستان وہیل چیئر کرکٹ ٹیم کے ارکان نے پاکستان کرکٹ بورڈ (پی سی بی) کے چیئرمین محسن نقوی سے ان کی دعوت پر قذافی سٹیڈیم میں ملاقات کی۔
پاکستانی ٹیم نے اس سال نیپال میں ہونے والی ایشین وہیل چیئر چیمپئن شپ فائنل میں سری لنکا کو شکست دے کر جیت لی تھی۔
محسن نقوی نے قومی ٹیم کو ٹی ٹوئنٹی وہیل چیئر کرکٹ ایشیا کپ 2023 کا ٹائٹل جیتنے پر مبارکباد دی اور انہیں 15 لاکھ روپے کا چیک دیا۔
انہوں نے ٹیم کی کوششوں کو سراہا اور ٹیم کی مسلسل کامیابی کے لیے نیک خواہشات کا اظہار کیا انہوں نے ٹیم کی مستقبل کی کوششوں کے لیے پی سی بی کے تعاون کا بھی یقین دلایا۔
قومی وہیل چیئر ٹیم کے ارکان نے ان کی میزبانی اور حوصلہ افزائی کرنے پر پی سی بی کا شکریہ ادا کیا۔
اجلاس میں پاکستان وہیل چیئر کرکٹ کونسل کی چیئرپرسن رخسانہ راجپوت، قومی وہیل چیئر ٹیم کے کپتان محمد ذیشان، نائب کپتان عمران آرائیں، بلے باز سید ارسلان احمد، وکٹ کیپر معظم نواز اور باؤلر محمد فیاض موجود تھے۔