اسد قیصر کا وزیراعلیٰ خیبر پختونخوا سے وفاقی حکومت کے ساتھ تعلقات ختم کرنے کا مطالبہ
اردو انٹرنیشنل ( مانیٹرنگ ڈیسک) تفصیلات کے مطابق پاکستان تحریک انصاف کے مرکزی رہنما اسد قیصر نے اپنی پارٹی کے وزیراعلیٰ خیبرپختونخوا علی امین گنڈاپور کو مشورہ دیا ہے کہ وہ وفاقی حکومت سے تمام رابطے ختم کر دیں کیونکہ وفاق ان کا کوئی بھی مطالبہ تسلیم نہیں کرے گا۔
اسد قیصر کی جانب سے یہ مشورہ وزیراعلیٰ خیبرپختونخوا علی امین گنڈا پور کی پشاور میں وزیر داخلہ محسن نقوی سے ملاقات کے ایک روز بعد سامنے آیا، اس ملاقات میں دہشت گردی کے خلاف جنگ کے لیے مشترکہ حکمت عملی پر تبادلہ خیال کیا گیا تھا۔
اسد قیصر نے اپنا ایک خصوصی ویڈیو بیان جاری کیا جس میں انہوں نے وزیر اعلیٰ خیبر پختونخوا علی امین گنڈا پور سے مطالبہ کیا کہ وہ وفاقی حکومت سے روابط ختم کریں۔
اپنے بیان میں اسد قیصر کا کہنا تھا کہ ہائی کورٹ کے چھ بہادرجج قوم کے ہیرو ہیں، ججوں نے بہادری سے اپنا موقف سپریم جوڈیشل کونسل اور چیف جسٹس کے سامنے رکھا، ان ججوں کو انصاف اور سیکورٹی فراہم کرنا چیف جسٹس کی ذمہ داری ہے۔
اسد قیصر نے کہا کہ وفاق نے وزیراعلیٰ خیبرپختونخوا کے مطالبے پر ایک بھی افسر تعینات نہیں کیا اور نہ ہی صوبے کو بقایا جات کی ادائیگی کے معاملے پر کوئی پیش رفت ہوئی ہے۔
انہوں نے مزید کہا کہ اب مفاہمت نہیں مزاحمت کا وقت ہے، یہ قوم کے حقوق کا سوال ہے، ہم ملک میں آئین کی بالادستی اور قانون کی حکمرانی کیلئے بڑی تحریک شروع کرنے والے ہیں ، وکلا، ٹیچرز، طالب علموں، کسانوں اوردیگرطبقات سے تحریک میں شامل ہونے کی درخواست کرتا ہوں۔