صدر عارف علوی کو کام سے روکنے اور عہدے سے ہٹانے کے لیے سپریم کورٹ میں درخواست دائر
صدر کے خلاف درخواست آئین کے آرٹیکل 184 کی شق 3 کے تحت غلام مرتضیٰ نے دائر درخواست میں موقف اختیار کیا ہے کہ صدر عارف علوی نے اپنے اختیارات کا غلط استعمال کیا ہے اور انہوں نے صدر مملکت کے عہدے کی تضحیک کی ہے.
درخواست گزار کا کہنا ہے کہ صدر پوری قوم کا ہوتا ہے ناکہ صرف ایک سیاسی جماعت کا ہوتاہے۔ درخواست گزار نے الزام عائد کیا ہے کہ عارف علوی نے اپنے صدراتی دفتر کو تحریک انصاف کی سیاسی سرگرمیوں کے لیے وقف کر رکھا ہے۔
درخواست میں کہا گیا ہے کہ عارف علوی، صدر کے عہدے کا غلط استعمال کرتے ہوۓ غیر آئینی اقدام کے بھی مرتکب ہوۓ ہیں۔درخواست گزار کا کہنا ہے کہ صدر نے اپنے آئینی ذمہ داری سے بھی پہلو تہی برتی ہے۔
درخواست میں کہا گیا ہے کہ عام انتخابات کی تاریخ دینا صدر کا کام تھا لیکن انہوں نے تاریخ نہیں دی، جبکہ صدر غیر قانونی طور پر اسمبلی کی تحلیل کے بھی مرتکب ہوئے ہیں۔صدر آئین کے آرٹیکل 5 کے تحت آئین پر عملداری کو یقینی نہیں بنایا۔
درخواست گزار نے عدالت سے استدعا کی ہے کہ عارف علوی کو بطور صدر کام کرنے سے روکا جائے اور ان کے خلاف آئین و قانون کی خلاف ورزی کرنے پر کارروائی عمل میں لائی جائے۔
صدر اور وزارت قانون کو درخواست میں فریق بنایا گیا ہے۔