اردو انٹرنیشنل (اسپورٹس ویب ڈیسک) تفصیلات کے مطابق ایشین فٹ بال کنفیڈریشن (اے ایف سی) کے ایلیٹ فٹسال انسٹرکٹر ناصر صالح کی زیر نگرانی 6 روزہ اے ایف سی فٹسال لیول 1کوچنگ کورس ہفتہ کو فٹ بال ہاؤس لاہور میں اختتام پذیر ہوا۔ ناصر صالح، جو ایران کی قومی فٹسال ٹیم کے سابق ہیڈ کوچ رہ چکے ہیں، نے پاکستان کے 16 کوچز کو تربیت دی۔
کورس کے اختتام پر شرکاء میں اسناد بھی تقسیم کی گئیں۔ ناصر صالح نے پاکستان فٹبال فیڈریشن (پی ایف ایف) کا شکریہ ادا کیا کہ انہیں دوسری مرتبہ پاکستان آنے کا موقع دیا۔ انہوں نے کورس کے کامیاب انعقاد پر پی ایف ایف کے فٹسال کے سربراہ محمد رضا فضلی کا بھی شکریہ ادا کیا۔ ناصر صالح نے کورس کے شرکاء کی سیکھنے کی صلاحیت کو سراہا اور ان کے عزم، محنت اور جوش کی تعریف کی۔