غزہ:اسپتال کے قریب اسرائیلی فوج کی شدید بمباری،23 فلسطینی شہید
ترک فرینڈ شپ اسپتال غزہ کے قریب اور دیگر علاقوں میں اسرائیلی فوج کی بمباری سے 23 فلسطینی شہید ہوگئے۔
عرب میڈیا کے مطابق اسرائیلی طیاروں نے رفاح کے مغربی حصوں میں شدید فضائی حملے کیے، زیتوں کے علاقے میں ایک گھر پر بمباری سے 7 جب کہ الزوائدہ میں ایک گھر پر بمباری میں بچوں سمیت 13 افراد شہید ہوگئے ہیں، جبکہ حملے میں متعدد افراد زخمی بھی ہوئے ہیں۔
ذرائع کے مطابق اسرائیلی قابض فورسز نے نابلس کے ایک اسپتال پر بھی دھاوا بولا اور طیاروں نے رفاح شہر کے مغربی حصوں پر شدید حملے کیےہیں۔
خبروں کے مطابق شمالی غزہ کی پٹی میں جبالیہ کیمپ پر اسرائیلی بمباری میں 3 افراد شہید ہوگئے ہیں۔
عرب میڈیا کے مطابق اسرائیلی فوج نے نابلس کے مغرب میں زاواٹا قصبے پر بھی دھاوا بولا اور صبح ہوتے ہی غزہ کی پٹی کے مختلف علاقوں پر حملے بھی شروع کردیے۔
بین الاقوامی میڈیا کے مطابق اسرائیلی فوج نے پارلیمنٹ کے رکن ڈاکٹر ناصر عبدالجواد کو دیر بلوت کے قصبے سے گرفتار کرلیا جب کہ السامو میونسپلٹی کونسل کے رکن آزاد قیدی خلدون المحریق کو بھی اسرائیلی قابض فوجوں نے گرفتار کر لیاہے۔
میڈیا کے مطابق اسرائیلی فوج نے غزہ کے البریح کیمپ کے مشرق میں گھروں پر دوبارہ بمباری بھی کی ہے۔
اسرائیلی فوج کے ترجمان نے کہاہے کہ حماس یرغمالیوں کو دباؤ اور نفسیاتی جنگ کے طور پر استعمال کرتی ہے۔
واضح رہے کہ 7 اکتوبر سے جاری حملوں میں شہید فلسطینیوں کی تعداد 8 ہزار 400 ہوگئی ہے جب کہ 23 ہزار سے زائد زخمی ہیں، شہدا میں 73 فیصد بچے، خواتین اور عمر رسیدہ افراد ہیں۔