رپورٹرز وِدآؤٹ بارڈرز کا جیل میں قید ڈیرہ غازیخان کے صحافیوں شیر افگن بزدار اور مصطفی لاشاری کی فوری رہائی کا مطالبہ
اردو انٹرنیشنل (مانیٹرنگ ڈیسک) صحافیوں کی عالمی تنظیم ” رپورٹرز وِدآؤٹ بارڈرز “ نے دو پاکستانی صحافیوں کی فوری رہائی کا مطالبہ کیا ہے جنھیں اس لیے حراست میں لیا گیا تھا کیونکہ انھوں نے صوبہ پنجاب کے شہر ڈیرہ غازی خان میں پریس کلب پر ایک اپوزیشن کی پریس کانفرنس کے دوران پولیس کے چھاپے پر اعتراض کیا تھا۔
بول نیوز ٹی وی چینل کے صحافی شیر افگن بزدار جو کہ پریس کلب کے صدر ہیں، اور روزنامہ اوصاف کے رپورٹر اور انجمن صحافیاں (یونین آف جرنلسٹس) کے صدر غلام مصطفی لاشاری کو 7 مئی کو حراست میں لیا گیا۔
جیل میں قید سابق وزیراعظم عمران خان کی جماعت پاکستان تحریک انصاف (پی ٹی آئی) کے حامیوں کی جانب سے پریس کانفرنس کے دوران پولیس کے چھاپے پر اعتراض کرنے پر 7 مئی کو پولیس نے حراست میں لیا تھا۔
رپورٹرز وِدآؤٹ بارڈرز نے کہا ہے کہ پولیس کی اس مداخلت کے خلاف احتجاج کرنے پر ان دو صحافیوں کو جیل میں ڈالنا ناقابل قبول ہے۔ یہ واضح طور پر انتقامی کارروائی ہے، ایک مخالف سیاسی جماعت کو پریس کلب میں پریس کانفرنس کرنے کی سزا۔ اعلیٰ سطح پر جاری ہونے والے سنسر شپ کے حکم کے نتیجے میں پاکستان کے تمام میڈیا پر بار بار دباؤ ڈالا جاتا رہا ہے کہ وہ اس پارٹی کو کور نہ کریں۔
ہم دونوں صحافیوں کی فوری رہائی کا مطالبہ کرتے ہیں اور پولیس سے اپیل کرتے ہیں کہ وہ پریس کلب کی سرگرمیوں میں مداخلت نہ کرے۔
پاکستان میں رپورٹرز وِدآؤٹ بارڈرز کے نمائندے نے چھاپے کی ویڈیوز دیکھی ہیں جس میں پولیس پی ٹی آئی کے مقامی رہنماؤں کو اپنی پریس کانفرنس روکنے کا حکم دیتی ہے، اور دو صحافی، بزدار اور لاشاری، پھر اعتراض کرتے ہوئے کہتے ہیں: “آپ پریس کلب کا تقدس پامال کر رہے ہیں۔ ” پولیس کی درخواست پر ڈپٹی کمشنر نے امن عامہ کو برقرار رکھنے کے قانون کے تحت دونوں صحافیوں کو 7 مئی سے 30 دن کے لیے حراست میں رکھنے کے احکامات جاری کیے۔
لاشاری کے بیٹے اسفند جنید لاشاری نے آر ایس ایف کو بتایا کہ ’’یہ دونوں صحافی محض اس وجہ سے جیل میں ہیں کہ انہوں نے پریس کلب کے تقدس کو برقرار رکھنے کی کوشش کی، جہاں ہر کسی کو حکومت سمیت کسی کے خلاف بھی بولنے اور اپنی شکایات کا اظہار کرنے کی اجازت ہے.
ڈیرہ غازی خان پریس کلب کے قائم مقام صدر فرید کھوسہ نے آر ایس ایف کو بتایا کہ پولیس دونوں صحافیوں کی حراست کو جواز فراہم کرنے کے لیے بہانے استعمال کر رہی ہے۔ انہوں نے کہا کہ حقیقت میں پولیس اس بات سے ناخوش ہے کہ پریس کلب نے پاکستان تحریک انصاف کے رہنماؤں کو اپنی جگہ استعمال کرنے کی اجازت دی۔
پولیس نے 18 مئی کو جنوب مغربی صوبہ بلوچستان کے دارالحکومت کوئٹہ میں ایک بلوچ یکجہتی کمیٹی کو جبری گمشدگیوں کے بارے میں پریس کانفرنس کرنے سے روکنے کے لیے پریس کلب کو گھیرے میں لے لیا۔
آر ایس ایف کے 2024 ورلڈ پریس فریڈم انڈیکس میں پاکستان 180 ممالک میں 152 ویں نمبر پر ہے۔
پاکستان فیڈرل یونین آف جرنلسٹ (پی ایف یو جے) نے 16 ایم پی او کے تحت ڈیرہغازیخان کے صحافیوں کی گرفتاریوں کی مذمت کی ہے اور انہیں فوری رہا کرنےاکا مطالبہ کیا ہے۔
اپنی پریس ریلیز میں پاکستان فیڈرل یونین آف جرنلسٹس پی ایف یو جے نے پنجاب پولیس کے ہاتھوں 16 ایم پی او کے تحت صحافیوں شیر افگن بزدار اور مصطفیٰ لاشاری کی گرفتاریوں کی شدید مذمت کی ہے۔
جمعہ کو جاری ہونے والے ایک بیان میں پی ایف یو جے کے صدر افضل بٹ اور سیکرٹری جنرل ارشد انصاری سیکرٹری خزانہ لالہ اسد پٹھان نے کہا کہ یہ انتہائی تشویشناک بات ہے کہ بزدار اور لاشاری جو کہ بالترتیب ڈیرہ غازی خان پریس کلب اور انجمن صحافیان کے صدر ہیں۔
پریس کلب میں پریس کانفرنس کرنے والے پی ٹی آئی رہنماؤں کی آزادی اظہار کو یقینی بنانے کے لیے گرفتار کیا گیا ہے۔
پی ایف یو جے کے رہنماؤں کا کہنا تھا کہ پولیس رہنماؤں کو پریس کانفرنس کرنے سے روکنے کے لیے کلب پہنچی اور کلب انتظامیہ پر پریس کانفرنس منسوخ کرنے کے لیے دباؤ ڈالا۔ انہوں نے مزید کہا کہ بزدار اور لاشاری نے پولیس کے اقدام کی مخالفت کی جس کی وجہ سے انہیں گرفتار کیا گیا۔
صحافیوں کے خلاف کالے قوانین منظور کرنے کے بعد اب پنجاب حکومت اختلافی آوازوں کو کچلنے اور حکومت کے غیر قانونی اقدامات کے خلاف مزاحمت کرنے والوں کو گرفتار کرنے کے لیے فاشسٹ ہتھکنڈے استعمال کر رہی ہے، دونوں رہنماؤں نے مزید کہا کہ حکومت اور پولیس کی اس طرح کی ہٹ دھرمی کو برداشت نہیں کیا جا سکتا۔
پی ایف یو جے کے رہنماؤں نے حکومت سے مطالبہ کیا کہ بزدار اور لاشاری کو فوری رہا کیا جائے۔ “ہم حکومت سے بھی مطالبہ کرتے ہیں کہ ان پولیس اہلکاروں کے خلاف کارروائی کی جائے جنہوں نے یہ غیر قانونی گرفتاریاں کی ہیں۔”
