ن لیگ اور پی ٹی آئی اشرافیہ کی نمائندہ جماعتیں ہیں،بلاول بھٹو
اردو انٹرنیشنل (مانیٹرنگ ڈیسک) چیئرمین پاکستان پیپلز پارٹی بلاول بھٹو نے مسلم لیگ ن اور پی ٹی آئی کو اشرافیہ کی نمائندہ جماعتیں قرار دیتے ہوئے کہا ہے کہ ان دونوں کو مقتدر قوتوں نے پنجاب پر مسلط کیا ہے۔
لاہور میں پیپلز پارٹی کی سنٹرل ایگزیکٹو کمیٹی اجلاس کے بعد پریس کانفرنس کرتے ہوئے بلاول بھٹو نے اپنے دس نکاتی منشور کی تفصیلات بھی بتائیں۔
انہوں نے کہا کہ ان کی جماعت برسراقتدار آکر غریب گھرانوں کو سولر انرجی سے 3-3 سو یونٹ مفت بجلی فراہم کرے گی، غریبوں کو 30 لاکھ گھر بنا کر دیں گے، ان گھروں کے مالکانہ حقوق خواتین کے نام ہوں گے۔
اپنے دس نکاتی منشور کی تفصیلات بتاتے ہوئے بلاول بھٹو کا کہنا تھا کہ تعلیم مفت ہوگی، علاج مفت ہوگا، کسانوں کو کسان کارڈ، مزدوروں کو سوشل سکیورٹی کیلئے مزدور کارڈ اور تعلیم مکمل کر کے روزگار تلاش کرنے والے نوجوانوں کو ایک سال تک یوتھ کارڈ دیکر پیسے دیے جائیں گے۔
پاکستان پیپلزپارٹی کے سینٹرل ایگزیکٹو کمیٹی کے اجلاس میں ملکی سیاسی صورت حال اور انتخابات کے حوالے سے سیاسی رابطوں پر گفتگو ہوئی.
پاکستان پیپلزپارٹی کی سینٹرل ایگزیکٹو کمیٹی کے اراکین کا صدر پی پی پی پی آصف علی زرداری اور چیئرمین پی پی پی بلاول بھٹو زرداری کی قیادت پر اعتماد کا اظہار کیا.
آصف علی زرداری نے پاکستان پیپلزپارٹی کی جانب سے وزیراعظم کے امیدوار کے طور پر چیئرمین بلاول بھٹو زرداری کا نام پیش کردیا.
پاکستان پیپلزپارٹی کی سینٹرل ایگزیکٹو کمیٹی نے چیئرمین بلاول بھٹو زرداری کے نام کی پی پی پی کی جانب سے وزیراعظم کے امیدوار کے طور پر توثیق کردی.
